اول ماجالى من مكتب التنسيق انى قبلت فى هندسة زراعية بصراحة انا فرحت شوية قلت اهو نص العمى ولا العمى كلة يعنى فى الاخر يتقالى يامهندسة وخلاص

من اول السنة وانا كنت بانكسف موت وانا رايحة عند القسم بتاعنا هو اصلا خارج كلية الزراعة خااالص بس لان عددنا كان كبير السنة دى)ياعينى كل اللى كان نفسة فى هندسة اتقلب ع الهندسة الزراعية)
فبناخد المحاضرات فى زراعة والسكاشن فى القسم

شوفو بقى كم العذاب اللى بنشوفة يعنى ساعات بيبقى عندنا محاضرة تخلص 11 وسيكشن فى القسم يبدأ 11 يانهاركو مهبب واحنا هنطيرولا اية المسافة مش بسيطة لا وكمان اية المعيدة عاوزانا فى الميعاد و11بالدقيقة هتقفل الباب يادى السنة السوخة ياولاد وساعات العكس يكون عندنا سيكشن مقدمة فى الهندسة فى القسم وبعدها ع طووووول سيكشن كيمياء بناخدة فى قسم الكيمياء جنب كلية الزراعة والتأخير بدرجات اة يانى يااما تعاليلى

سيبكو من اللى عاوز يجيب سندوتش ولا ع الاقل كيس شيبسى لانة بنبقى فى المحاضرة من 9 ل 11 وبعدها سيكشن ل3 يولع الطالب بجاز
بس بالله دة مش يبقى ظلم وافترى

طيب انا هاحكيلكم عن عذابى بقالى يومين
هاقططتع لكم من حياتى اليومين دول بس

يوم الثلاثاء طبعا المفروض نبدأ من 11 سيكشن كيمياء وبعدين المقدمة انما لان المعيدة مش عاوزة تتأخر بس والله انا بحبها اوى ..
المهم
فقدمت معاد المبادئ وبقينا بنبتدى يومنا الساعة 9 ل11 مقدمة وميكانيكا متسألونيش ازاى هتاخدو سيكشن المقدمة والميكانيكا فى نفس الوقت ودى مادة ودى مادة تانية خااالص

بس لانها نفس المعيدة للمادتين فبتدمجهم سوا ميكانيكا ربع ساعة والباقى مقدمة
كان عندنا عملى نشوف الالات فى المقدمة طبعا 10 10 يدخلو المعمل
ماهو مش سوق علشان كل طلاب السيكشن يدخلو مرة واحدة
المهم طبعا لقربى من قلب بش مهندسة هبةالمعيدة دخلت مع اللى دخلو فى الاول

انما بقى طبعا الاولاد فى الاخر شوفو بقى اللى حصل

طبعا بما انى خلصت بدرى جريت ع الكافيتيريا

طلبت الاكل واخدت معايا السندوتشات وجررررررى ع الكلية بس المهم اكلت وروحت فى معادى سيكشن الكيمياء....
انما بقى ياعينى الاولاد والبنات الغلابة اللى خرجو من العملى متأخر والمهندسة هبة قالت لهم مش تخافو دى المهندسة ميرفت تبعنا ومش هاتقول حاجة

جم بقى الغلابة يدخلو وجايين اية جرررى لقيو باب الجنة اقصد باب السيكشن اتقفل

طيب يابش.... ياانسة ياانسة والله كنا فى سيكشن

نو نو ماينفعش انتو متأخرين..

طيب يابشمهندسة معلش كنا فى عملى..

ابدا انا قلت كلمة وخلاص انا قايلة من المرة اللى فاتت..

يادكتورة ربنا يخليكى عملى الكيمياء صعب وانتى هتنقصى درجات...

لالا وبعدين مبحبش الوقفة كدة ع الباب

وراحت رزعة الباب

طبعا كلنا اتضايقنا وبما انى موكلة الشكاوى فى القسم وانى مبخفش من حد وجريئة وطبعا حبة البكش دول اللى البنات قالوهملى علشان اقوم اتكلم كلمتين يمكن تحن

من فضلك يابش مهندسة *انا بصوت جهوور) دلوقتى احنا كنا فى السيكشن المقدمة وبندخل 10 بعد10يعنى فية طلعو بدرى وفية كتير اتأخرو فيعنى ممكن حضرتك تسامحيهم والله حضرتك دة مش ذنبهم دة ذنب المهندسة هبة وبعدين ظروف المقدمة و.. و... و

طبعا كل اللى عملتوة فتحت كشكولها وبدأت تكتب

ياحلاوة العيد واللبس جديد دة العيال صوتها اتنبح و دة كلة فى جردل الزبالة اة لو كان معايا رصاصتين... بس للاسف الرصاصة لم تعد فى جيبى


فات نص ساعة وكل طالب او طالبة يجو مايدخلوش واللى يقف برة تقولة لو سمحت هنقفل الباب

طيب يعنى نروح يابش مهندسة..
ايوة..
طيب حتى نحضر العملى بس واكتبينا غياب براحتك
لا نو واى ومتقفوش هنا
المهم فاتت نص ساعة وفية عيال روحو وناس لسة
المهم راح كام ولد كدة لبشمهندسة هبة وجابوها معاهم اتوسطت لهم ودخلو
طيب والغلابة اللى فاتتهم السيكشن دول ياربى بقى مش حرام عليكى ياظالمة.

تخاريف طالبه ف الهندسة الزراعيه متجدد باذن الله